ملک بھر کے لئے کریکٹر سرٹیفکیٹ کا نظام یکساں

وزارتِ داخلہ نے بیرونِ ملک سفر کرنے والے شہریوں اور ملازمت کے امیدواروں کے لیے ایک تاریخی سہولت کا اعلان کرتے ہوئے ملک بھر میں پولیس کریکٹر سرٹیفکیٹ کے حصول کا نظام یکساں کر دیا ہے۔ نئے اعلامیے کے مطابق، اب چاروں صوبوں سمیت گلگت بلتستان اور آزاد کشمیر کے پولیس ریکارڈ کو ایک مرکزی ڈیٹا بیس میں یکجا کر دیا گیا ہے۔

اس انقلابی تبدیلی کے بعد اب شہریوں کو الگ الگ صوبائی دفاتر کے چکر کاٹنے کی ضرورت نہیں رہے گی، بلکہ تمام پاکستانیوں کا مرکزی ریکارڈ نیشنل پولیس بیورو میں محفوظ کر لیا گیا ہے۔ اب کریکٹر سرٹیفکیٹ صرف اسی ایک مرکزی ادارے سے جاری ہوگا، جس سے پولیس ویریفکیشن کا برسوں پرانا اور پیچیدہ عمل نہ صرف تیز ہو جائے گا بلکہ شفاف بھی رہے گا۔

جدید ٹیکنالوجی سے لیس اس نظام کے تحت شہری اب گھر بیٹھے آن لائن پولیس کریکٹر سرٹیفکیٹ حاصل کر سکیں گے۔ پہلی بار ملک بھر کا پولیس ریکارڈ ایک ہی ڈیٹا بیس میں شامل ہونے سے بیرونِ ملک جانے والوں اور مختلف اداروں میں ملازمت کے لیے درخواست دینے والوں کو درپیش کاغذی کارروائی کی رکاوٹیں ختم ہو جائیں گی۔