جنوبی بھارتی سپر اسٹار جوزف وجے نے تامل ناڈو کے نئے وزیراعلیٰ کے عہدے کا حلف اٹھا لیا

جنوبی بھارت کے معروف سابق اداکار اور سیاست دان جوزف وجے نے ریاست تامل ناڈو کے نئے وزیراعلیٰ کی حیثیت سے عہدے کا حلف اٹھا لیا۔

بھارتی میڈیا کے مطابق اتوار کو چنئی کے نہرو اسٹیڈیم میں منعقدہ پروقار تقریب میں جوزف وجے نے تامل ناڈو کے 13ویں وزیراعلیٰ کے طور پر حلف لیا۔

جوزف وجے نے فروری 2024 میں اپنی سیاسی جماعت تامیلاگا ویٹری کازگام قائم کرنے کا اعلان کرتے ہوئے فلمی دنیا چھوڑ دی تھی۔ ان کی نوخیز جماعت نے اپنے پہلے ہی انتخاب میں غیر معمولی کامیابی حاصل کرتے ہوئے 234 رکنی اسمبلی میں 108 نشستیں جیت لیں۔

اگرچہ واضح اکثریت کے لیے 118 نشستیں درکار تھیں تاہم اتحادی جماعتوں کی حمایت کے بعد وجے حکومت بنانے میں کامیاب ہوگئے۔ یوں سیاست میں باقاعدہ شمولیت کے صرف 27 ماہ بعد وہ وزیراعلیٰ کے منصب تک پہنچ گئے۔

حلف اٹھانے کے بعد جوزف وجے نے عوامی فلاح سے متعلق تین بڑے فیصلوں کا اعلان کیا جن میں گھریلو صارفین کے لیے 200 یونٹ مفت بجلی، خواتین کے تحفظ کے لیے خصوصی فورس اور ہیلپ لائن، جبکہ منشیات کے خاتمے کے لیے مربوط نظام شامل ہے۔

اپنے خطاب میں انہوں نے شفاف حکمرانی اور سماجی انصاف کے عزم کا اظہار کرتے ہوئے کہا کہ ان کی حکومت عوام کے اعتماد پر پورا اترے گی اور ہر مذہب و طبقے کی نمائندگی کرے گی۔