دبئی کا میگا میوزک فیسٹیول اَن ٹولڈ نومبر میں دوبارہ رنگ جمائے گا

دبئی: عالمی سیاحت اور تفریح کا مرکز دبئی ایک بار پھر مشرقِ وسطیٰ کے سب سے بڑے میوزک فیسٹیول ’اَن ٹولڈ دبئی‘ (UNTOLD Dubai) کے تیسرے ایڈیشن کی میزبانی کے لیے تیار ہے۔ یہ میگا فیسٹیول 5 سے 8 نومبر 2026ء تک دبئی پارکس اینڈ ریزورٹس میں منعقد ہوگا۔

سرکاری اعلامیے کے مطابق رواں سال یہ ایونٹ ’’ریٹرن ٹو ونڈر‘‘ (Return to Wonder) کے منفرد تھیم کے تحت چار دن اور چار راتوں پر محیط ہوگا، جس کے دوران دبئی پارکس اینڈ ریزورٹس کو ایک عظیم الشان موسیقی کے میدان میں تبدیل کر دیا جائے گا۔ فیسٹیول میں الیکٹرانک ڈانس میوزک (EDM)، ٹیکنو، پاپ، ہپ ہاپ اور آر اینڈ بی (R&B) سمیت مختلف شعبوں سے تعلق رکھنے والے عالمی شہرت یافتہ فنکار اپنے فن کا مظاہرہ کریں گے۔ اگرچہ 2026ء کے ایڈیشن کے لیے فنکاروں کی مکمل فہرست جلد جاری کی جائے گی، تاہم انتظامیہ کا کہنا ہے کہ دنیا کے نامور بینڈز اور ڈی جیز اس فیسٹیول کا حصہ ہوں گے۔

منتظمین کی جانب سے فیسٹیول کے پاسز اور ٹکٹوں کی معلومات جاری کر دی گئی ہیں۔ دبئی پارکس اینڈ ریزورٹس میں انعقاد کے باعث شائقین کو موسیقی کے ساتھ ساتھ تھیم پارکس اور تفریحی سرگرمیوں سے لطف اندوز ہونے کا موقع بھی ملے گا۔ ماہرین کے مطابق یہ ایڈیشن دبئی کی لائیو انٹرٹینمنٹ، سیاحت اور نائٹ لائف انڈسٹری میں ایک اہم سنگِ میل ثابت ہوگا اور نومبر کے مہینے میں عالمی موسیقی کے شائقین کو دبئی کی جانب متوجہ کرے گا۔