انرجی ڈرنکس کی عادت سے روسی نوجوان چلنے پھرنے سے معذور

روس کے سینٹ پیٹرزبرگ میں 22 سالہ آرٹیم کمپیوٹر گیمز کا شوقین تھا اور جاگتے رہنے کے لیے توانائی بخش مشروبات یعنی انرجی ڈرنکس پیتا تھا۔ ابتدا میں وہ روزانہ صرف ایک بوتل پیتا تھا، لیکن وقت کے ساتھ یہ عادت بڑھ گئی اور وہ خالی پیٹ 3 سے 5 بوتلیں تک پینے لگا۔

ایک دن شدید پیٹ درد، الٹی اور متلی کے بعد اسے اسپتال منتقل کیا گیا، جہاں پینکریاٹائٹس (لبلبے کی سوزش) کی تشخیص ہوئی۔ علاج کے باوجود بیماری دوبارہ لوٹ آئی اور لبلبے میں ایک سسٹ (تھیلی) بن گئی۔

تیسری بار اسپتال جانے پر صورتحال خطرناک حد تک خراب ہو گئی۔ لبلبے میں پیورلینٹ نیكروسس (گندے سوجن والے ٹشوز) پیدا ہو گئے، جسم میں زہر پھیل گیا اور آرٹیم کی ٹانگیں مفلوج ہو گئیں۔ اب وہ بحالی کے عمل سے گزر رہا ہے اور دوبارہ چلنے کی تربیت لے رہا ہے۔

ماہرین خبردار کرتے ہیں کہ انرجی ڈرنکس کا زیادہ استعمال، خاص طور پر خالی پیٹ، لبلبے، دل اور خون کی شریانوں کے لیے انتہائی خطرناک ہے۔