برآمدات میں اضافے کیلئے نجی شعبے کو بھی آگے آنا ہوگا: ہارون اختر خان

لاہور: وزیراعظم کے معاونِ خصوصی ہارون اختر خان نے کہا ہے کہ ملکی معیشت کی مضبوطی اور برآمدات میں خاطر خواہ اضافے کے لیے نجی شعبے کو اپنا بھرپور کردار ادا کرنا ہوگا، جبکہ حکومت تاجر و صنعت کار برادری کو تمام ممکنہ سہولیات کی فراہمی کے لیے کوشاں ہے۔

لاہور چیمبر آف کامرس اینڈ انڈسٹری (LCCI) میں میڈیا کے نمائندگان سے گفتگو کرتے ہوئے ہارون اختر خان نے زور دیا کہ پائیدار معاشی ترقی کے لیے ملک میں سیاسی استحکام کا ہونا انتہائی ناگزیر ہے۔ انہوں نے کہا کہ جب تک سیاسی اور انتظامی استحکام برقرار نہیں رہے گا، معاشی اصلاحات کے ثمرات حاصل نہیں کیے جا سکتے۔ انہوں نے کہا کہ حالیہ دفاعی و سفارتی معرکوں میں پاکستان کی کامیابی کے بعد بین الاقوامی سطح پر ملک کے وقار میں نمایاں اضافہ ہوا ہے اور گرین پاسپورٹ کی عزت بڑھی ہے، جبکہ دنیا خطے میں امن کے لیے پاکستان کے قائدانہ کردار کی معترف ہے۔

ان کا مزید کہنا تھا کہ اعلیٰ ترین قیادت کی سرپرستی میں پاکستان ترقی کی راہ پر گامزن ہے اور اس وقت غیر ملکی سرمایہ کار کمپنیوں کی ملک میں سرمایہ کاری کے لیے قطاریں لگی ہوئی ہیں۔ حکومت صنعت کاروں کو سازگار، شفاف اور آسان کاروباری ماحول (Ease of Doing Business) فراہم کر رہی ہے تاکہ برآمدات بڑھا کر قومی معیشت کو پاؤں پر کھڑا کیا جا سکے۔