سہیل آفریدی کی آیت نور کے گھر آمد، ملزمان کو کڑی سزا دینے کی یقین دہانی

ہری پور: وزیر اعلیٰ خیبر پختونخوا سہیل آفریدی نے ہری پور میں اغوا کے بعد زیادتی کا نشانہ بننے والی 5 سالہ معصوم بچی آیت نور کے گھر پہنچ کر ان کے والد سے ملاقات کی، فاتحہ خوانی کی اور گہرے دکھ و افسوس کا اظہار کیا۔

ملاقات کے دوران معصوم آیت نور کے والد نے غمزدہ ماحول میں ہری پور کے تمام شہریوں کا شکریہ ادا کرتے ہوئے اپیل کی کہ ان کی بچی کے ساتھ بربریت کرنے والے ملزمان کو سرِعام پھانسی دی جائے تاکہ کوئی اور معصوم اس طرح کا نشانہ نہ بنے۔ اس موقع پر گفتگو کرتے ہوئے وزیراعلیٰ سہیل آفریدی اپنے جذبات پر قابو نہ رکھ سکے اور آبدیدہ ہو گئے۔ انہوں نے کہا کہ یہ دل دہلا دینے والا واقعہ صرف ایک خاندان کا نہیں بلکہ پورے صوبے کا دکھ ہے اور حکومت اس ناانصافی پر خاموش نہیں رہے گی۔

وزیراعلیٰ نے یقین دہانی کرائی کہ کیس کے تمام ملوث افراد کو قانونی دائرے میں لا کر عبرت کا نشان بنایا جائے گا اور عدالتوں سے بھی التجا کی جائے گی کہ ملزمان کو کسی قسم کا ریلیف نہ ملے۔ انہوں نے اعلان کیا کہ صوبائی حکومت کا آئندہ ‘چائلڈ پروٹیکشن بل’ معصوم آیت نور کے نام سے منسوب کیا جائے گا، جبکہ بچی کے علاقے کے سرکاری ہائی اسکول کا نام بھی آیت نور کے نام پر رکھا جائے گا۔ یاد رہے کہ 5 سالہ آیت نور 15 روز قبل پراسرار طور پر لاپتہ ہوئی تھی جس کی بوری بند لاش بعد میں ایک کنویں سے برآمد ہوئی تھی۔