کسی نے ہمیں دھرنے سے اٹھانے کی کوشش کی تو وہ اپنا شوق پورا کرلے: حافظ نعیم

لاہور: امیر جماعت اسلامی حافظ نعیم الرحمان نے حکومت کو للکارتے ہوئے کہا ہے کہ پٹرولیم لیوی اور مہنگائی کے خلاف جماعت اسلامی کا احتجاج جاری رہے گا، اور اگر کسی نے پرامن دھرنے سے مظاہرین کو اٹھانے کی کوشش کی تو وہ اپنا شوق پورا کر لے۔

لاہور میں ایک پریس کانفرنس سے خطاب کرتے ہوئے حافظ نعیم الرحمان نے کہا کہ حکومت پٹرولیم لیوی کی صورت میں غریب عوام سے بھتہ وصول کر رہی ہے۔ عالمی منڈی میں پٹرولیم مصنوعات کی قیمتوں میں کمی کے باوجود عوام کو کسی قسم کا ریلیف نہیں دیا جا رہا۔ انہوں نے کہا کہ دھرنوں اور احتجاجی مظاہروں کی صورت میں پورے ملک میں ایک تاریخی جدوجہد کا آغاز ہو چکا ہے، اور جگہ جگہ دیے جانے والے دھرنے عوام میں بیداری اور شعور پیدا کر رہے ہیں۔

امیر جماعت اسلامی نے حکومت کے بے جا اخراجات اور فارم 47 کی بنیاد پر حکومت قائم کرنے کا الزام لگاتے ہوئے کہا کہ وفاقی حکومت کے اپنے سالانہ اخراجات 1 ٹریلین (ایک کھرب) روپے تک پہنچ چکے ہیں جبکہ عوام کو شدید لوڈشیڈنگ اور مہنگائی کے عذاب میں مبتلا کیا گیا ہے۔ انہوں نے مطالبہ کیا کہ حکمران مراعات ختم کریں اور سرکاری گاڑیوں کا سائز 1300 سی سی سے زیادہ نہیں ہونا چاہیے۔ انہوں نے لاہور میں طویل دھرنے کی دھمکی دیتے ہوئے تمام سیاسی اور سماجی طبقوں کو اس میں شرکت کی دعوت دی۔