معروف کوہ پیما سید علی شاہ کی میت 31 دن بعد فلک سیر کی چوٹی سے تلاش کرلی گئی

سوات: وادی سوات کے معروف مقامی کوہ پیما سید علی شاہ کی میت 31 روز بعد فلک سیر (Falak Sar) کی دشوار گزار اور بلند پہاڑی چوٹی سے ڈرون کی مدد سے تلاش کر لی گئی ہے۔

ذرائع کے مطابق سید علی شاہ 31 دن قبل سوات کی بلند ترین چوٹی فلک سیر کو سر کرنے کی مہم جوئی کے دوران شدید برفباری اور حادثے کے باعث لاپتہ ہو گئے تھے۔ گزشتہ روز جدید ڈرون ٹیکنالوجی کے ذریعے کیے جانے والے سرچ آپریشن کے دوران 5,918 میٹر بلند اس دشوار گزار چوٹی پر ان کی میت کی موجودگی کی حتمی تصدیق کی گئی۔ شدید برفباری اور انتہائی بلندی کے باعث پیدل ریسکیو ٹیموں کے لیے میت کو نیچے منتقل کرنا انتہائی ناممکن قرار دیا جا رہا ہے۔

سید علی شاہ کی میت کی نشاندہی کے بعد ان کے اہل خانہ، مقامی افراد اور کوہ پیما برادری نے حکومت اور پاک فوج کے امدادی اداروں سے ہنگامی اپیل کی ہے۔ انہوں نے مطالبہ کیا ہے کہ میت کو بحفاظت نیچے لانے کے لیے فوری طور پر ریسکیو ہیلی کاپٹر فراہم کیا جائے تاکہ ان کی میت کو احترام کے ساتھ ان کے آبائی علاقے منتقل کر کے تدفین کی جا سکے۔