امریکی پابندیوں کے تسلسل سے مہنگائی میں مزید اضافہ ہو سکتا ہے: ایرانی صدر

تہران: ایرانی صدر مسعود پزشکیان نے ملکی صورتحال اور درپیش معاشی چیلنجز پر قوم سے اپنے اہم خطاب میں خبردار کیا ہے کہ امریکی پابندیوں کا تسلسل ملک میں مہنگائی اور معاشی مشکلات کو مزید بڑھا سکتا ہے۔

قومی ٹیلی ویژن پر خطاب کرتے ہوئے صدر مسعود پزشکیان نے کہا کہ دشمن کا ایران کو اندرونی انتشار اور افراتفری کا شکار کرنے کا اندازہ مکمل طور پر غلط نہیں تھا، تاہم عوام کی بھرپور شرکت اور رہبرِ انقلاب کی حکمتِ عملی اور رہنمائی کے باعث دشمن کی تمام تر سازشیں ناکام ہو گئیں۔ انہوں نے کہا کہ جدید ٹیکنالوجی اور مصنوعی ذہانت (AI) کی بنیاد پر تخمینہ لگانے والے عناصر کا خیال تھا کہ وہ ملک میں بدنظمی پیدا کر لیں گے، لیکن ایرانی قوم نے ان کے منصوبے مسمار کر دیے۔

ایرانی صدر نے خارجہ پالیسی کے ترجیحات پر روشنی ڈالتے ہوئے کہا کہ ہمسایہ ممالک کے ساتھ بہترین اور خوشگوار تعلقات کا قیام حکومت کی اولین ترجیح ہے، جبکہ تمام اسلامی ممالک کے ساتھ تمام تر شعبوں میں باہمی تعاون کو فروغ دینا وقت کی اہم ضرورت ہے۔ انہوں نے مزید انکشاف کیا کہ سفارتی و معاشی کوششوں کے نتیجے میں اور اسلام آباد ایم او یو (MoU) پر عمل درآمد کے دوران ایران تقریباً 9 کروڑ بیرل خام تیل فروخت کرنے میں کامیاب رہا ہے۔