پاکستان چین دوستی کو ڈیٹا، ٹیکنالوجی کے نئے دور میں داخل کرنا چاہتے ہیں: مریم نواز

بیجنگ: وزیراعلیٰ پنجاب مریم نواز شریف نے کہا ہے کہ پاکستان اور چین کے تعلقات آزمودہ، مضبوط اور باہمی احترام پر مبنی ہیں، اور اب وقت آ گیا ہے کہ اس لازوال دوستی کو ڈیٹا، مصنوعی ذہانت (AI) اور جدید ٹیکنالوجی کے نئے دور میں منتقل کیا جائے۔

چین کے دورے کے دوران بیجنگ میں انٹرنیشنل بگ ڈیٹا ایکسپو (International Big Data Expo) سے خطاب کرتے ہوئے مریم نواز نے چینی سرمایہ کاروں کو پنجاب میں انفارمیشن ٹیکنالوجی، زراعت اور ڈیجیٹل معیشت کے شعبوں میں سرمایہ کاری کی پرزور دعوت دی۔ انہوں نے کہا کہ پنجاب کو جدید ٹیکنالوجی کا مرکز بنانا حکومت کا بنیادی ہدف ہے، اور صوبے کے باصلاحیت نوجوانوں کو اے آئی اور ڈیجیٹل مہارتوں سے آراستہ کیا جا رہا ہے۔ انہوں نے مزید کہا کہ پنجاب تمام صوبوں کے لیے “فوڈ باسکٹ” کا کردار ادا کر رہا ہے اور یہاں زراعت و سمارٹ فارمنگ کے شعبے میں انقلابی اصلاحات کی جا رہی ہیں۔

اپنے دورے کے دوران وزیراعلیٰ پنجاب مریم نواز نے بیجنگ میں کمیونسٹ پارٹی کے سینئر رہنما اور پارٹی سیکرٹری ہی ژونگ یو (He Zhongyou) سے بھی اہم ملاقات کی، جس میں پاک چین اقتصادی راہداری (CPEC)، زرعی ترقی اور ٹیکنالوجی کے تبادلے پر تفصیلی گفتگو ہوئی۔ مریم نواز نے گویژو میں چین کی تیز رفتار ڈیجیٹل پیشرفت کی تعریف کرتے ہوئے کہا کہ چین کی ڈیجیٹل معیشت پاکستان کے لیے ایک قابلِ تقلید ماڈل ہے۔