علی پرویز ملک کی او آئی سی سی آئی اور پی ایس او قیادت سے الگ الگ ملاقاتیں

کراچی: وفاقی وزیرِ مملکت برائے پٹرولیم علی پرویز ملک نے کراچی میں اوورسیز انویسٹرز چیمبر آف کامرس اینڈ انڈسٹری (OICCI) اور پاکستان سٹیٹ آئل (PSO) کی اعلیٰ قیادت سے الگ الگ اہم ملاقاتیں کیں، جن میں ملکی پٹرولیم سیکٹر میں توانائی کے تحفظ، غیر ملکی سرمایہ کاری اور جاری اصلاحات پر تفصیلی تبادلہ خیال کیا گیا۔

او آئی سی سی آئی (OICCI) کے اجلاس میں صنعتی رہنماؤں، بین الاقوامی سرمایہ کاروں اور میڈیا نمائندگان سے گفتگو کرتے ہوئے علی پرویز ملک نے کہا کہ حکومت ایک مسابقتی، سرمایہ کاری دوست اور طویل مدتی پالیسیوں سے ہم آہنگ پٹرولیم سیکٹر تشکیل دے رہی ہے۔ انہوں نے بتایا کہ تیل و گیس کی دریافت (Exploration)، ریفائننگ اور ڈاؤن اسٹریم مارکیٹس میں کلیدی اصلاحات جاری ہیں، جبکہ بانڈڈ اسٹوریج اور اسٹریٹجک پٹرولیم ریزروز کا قیام حکومتی ترجیحات میں شامل ہے۔ اس موقع پر او آئی سی سی آئی کے صدر نے ٹیکس فریم ورک میں تسلسل اور شفافیت پر زور دیتے ہوئے کہا کہ پائیدار پالیسیاں ہی غير ملکی سرمایہ کاروں کا اعتماد بحال رکھ سکتی ہیں۔

بعد ازاں، پاکستان سٹیٹ آئل (PSO) کی قیادت کے ساتھ اجلاس کے دوران قومی توانائی کی سیکیورٹی، ایندھن کی سپلائی چین اور اسٹریٹجک اسٹوریج کی گنجائش بڑھانے کے امور پر غور کیا گیا۔ وزیرِ مملکت نے ملک بھر میں ایندھن کی بلا تعطل فراہمی یقینی بنانے پر پی ایس او کے کردار کو سراہا۔ انہوں نے پٹرولیم سیکٹر کی کارکردگی اور بروقت فیصلہ سازی کو مزید بہتر بنانے کے لیے جدید ڈیجیٹل ٹیکنالوجی کو اپنانے کی ضرورت پر زور دیا۔