محسن نقوی کا جناح انٹرنیشنل ایئرپورٹ کا دورہ، امیگریشن سسٹم ڈاؤن ہونے پر فوری ہدایت

کراچی: وفاقی وزیرِ داخلہ محسن نقوی نے جناح انٹرنیشنل ایئرپورٹ کراچی کا مفصل دورہ کیا، جہاں انہوں نے امیگریشن کاؤنٹرز پر مسافروں کی کلیئرنس کے عمل، دستاویزات کی جانچ پڑتال اور فراہم کی جانے والی سہولیات کا تفصیلی جائزہ لیا۔

دورے کے دوران وزیرِ داخلہ نے بیرونِ ملک روانہ ہونے والے مسافروں سے بالمشافہ ملاقات کی اور ان سے امیگریشن عمل میں پیش آنے والے مسائل اور درپیش وقت سے متعلق دریاف کیا۔ دورے کے موقع پر ایئرپورٹ کا بنیادی امیگریشن سسٹم اچانک ڈاؤن ہو گیا، جس پر وزیرِ داخلہ نے فوری نوٹس لیتے ہوئے موقع پر ہی متعلقہ حکام سے ٹیلی فونک رابطہ کیا اور فنی خرابی کو فی الفور دور کرنے کی سخت ہدایت جاری کی۔ محسن نقوی نے حکم دیا کہ مرکزی سسٹم میں خرابی کے وقت ہمیشہ مؤثر متبادل (Backup) انتظام موجود رہنا چاہیے تاکہ کسی بھی صورت امیگریشن کا عمل متاثر یا معطل نہ ہو۔

علاوہ ازیں، وزیرِ داخلہ نے جعلی اور نا مکمل دستاویزات پر سفر کرنے کی کوشش کرنے والے عناصر کے خلاف زیرو ٹالرنس پالیسی اپنانے کی ہدایت کی۔ انہوں نے واضح کیا کہ نامکمل یا بغیر تصدیق شدہ پاسپورٹ اور دستاویزات کے حامل کسی بھی مسافر کو بیرونِ ملک جانے کی اجازت نہیں دی جائے گی اور ملوث افراد اور متعلقہ ایجنٹوں کے خلاف سخت قانون کے مطابق کارروائی کی جائے گی۔