آر ایل این جی کی عدم دستیابی سے بجلی کی پیداوار متاثر ہوئی: پاور ڈویژن

اسلام آباد: پاور ڈویژن کے ترجمان نے کہا ہے کہ ری گیسیفائیڈ مائع قدرتی گیس (RLNG) کی عدم دستیابی اور گیس کارگو کی آمد میں تاخیر کے باعث گزشتہ رات ملک میں بجلی کی مجموعی پیداوار عارضی طور پر متاثر ہوئی۔

ترجمان پاور ڈویژن کے مطابق آر ایل این جی پاور پلانٹس سے 3,600 میگاواٹ اور منگلا ہائیڈل پاور اسٹیشن سے 195 میگاواٹ پیداوار میں کمی کے باعث گرڈ میں توازن برقرار رکھنے کے لیے عارضی لوڈ مینجمنٹ کا سہارا لینا پڑا۔ رات کے پیک آورز (Peak Hours) کے دوران مختلف علاقوں میں ڈیڑھ سے تین گھنٹے تک کی عارضی لوڈ شیڈنگ کی گئی۔ ترجمان نے بتایا کہ رات کے اوقات میں بجلی کی شدید طلب کو پورا کرنے اور نظام کو برقرار رکھنے کے لیے متبادل کے طور پر مہنگے فرنس آئل (Furnace Oil) سے چلنے والے پاور پلانٹس بھی فوری طور پر فعال کیے گئے۔

پاور ڈویژن نے وضاحت کی کہ آر ایل این جی کارگو پہنچتے ہی رات کے اوقات میں عارضی لوڈ مینجمنٹ پر مکمل قابو پا لیا جائے گا، جبکہ دن کے اوقات میں ملک بھر میں کسی قسم کی لوڈ شیڈنگ نہیں کی جا رہی اور زیادہ نقصان والے علاقوں میں بھی مقررہ شیڈول کے مطابق بجلی فراہم کی جا رہی ہے۔ پاور ڈویژن نے عوام سے اپیل کی ہے کہ وہ رات کے پیک آورز میں بجلی کا استعمال اعتدال سے کریں، اور گیس کی عدم دستیابی کے باعث صارفین کو درپیش عارضی زحمت پر باقاعدہ معذرت بھی کی ہے۔