واشنگٹن میں شاہ چارلس کے استقبال کی تیاریوں کے دوران بڑی غلطی

امریکہ کے دارالحکومت واشنگٹن میں شاہ چارلس کے تاریخی دورے کی تیاریوں کے دوران اس وقت ایک دلچسپ مگر عجیب صورتحال پیدا ہوگئی جب پروٹوکول کی سنگین غلطی کے باعث وائٹ ہاؤس کے قریب برطانوی ‘یونین جیک’ کے بجائے آسٹریلیا کے جھنڈے لہرا دیے گئے۔

برطانوی خبر رساں ایجنسی رائٹرز کے مطابق، امریکی محکمہ نقل و حمل (DDOT) کے حکام نے شاہ چارلس کے استقبال کے لیے مجموعی طور پر 230 جھنڈے نصب کیے تھے، لیکن عملے کی غلط فہمی کی وجہ سے ان میں 15 آسٹریلوی پرچم بھی شامل ہوگئے۔ اگرچہ شاہ چارلس آسٹریلیا کے بھی سربراہِ مملکت ہیں، لیکن یہ دورہ برطانیہ کے بادشاہ کی حیثیت سے ہو رہا ہے، اس لیے سفارتی لحاظ سے یہ ایک بڑی غلطی تصور کی گئی۔

ایک اعلیٰ امریکی عہدیدار نے میڈیا کو بتایا کہ غلطی کی نشاندہی ہوتے ہی اسے فوری طور پر درست کر دیا گیا ہے۔ یہ دورہ امریکہ کی آزادی کے 250 سال مکمل ہونے کے موقع پر ہو رہا ہے اور اسے شاہ چارلس کے دورِ حکومت کا سب سے اہم غیر ملکی دورہ قرار دیا جا رہا ہے۔ مبصرین کے مطابق، اس دورے کا اصل مقصد حالیہ عالمی حالات کی وجہ سے پاک-امریکہ اور برطانیہ کے تعلقات میں آنے والی مبینہ کشیدگی کو کم کرنا اور اتحادیوں کے درمیان ‘جمی برف’ کو پگھلانا ہے۔

واضح رہے کہ آسٹریلیا اور برطانیہ کے پرچموں میں ‘یونین جیک’ کی موجودگی کی وجہ سے مماثلت پائی جاتی ہے، جس نے عملے کو دھوکا دیا۔ تاہم، پیر کے روز شاہ چارلس کی آمد سے قبل تمام غلط پرچم ہٹا کر وہاں برطانوی پرچم لہرا دیے گئے ہیں تاکہ باقاعدہ استقبالیہ تقاریب میں کوئی رکاوٹ نہ آئے۔