پاکستان میں سونے کی قیمت میں بڑا اضافہ، چاندی بھی مہنگی

عالمی مارکیٹ میں سونے کی قیمتوں میں غیر معمولی اضافے کے باعث پاکستان میں بھی سونے اور چاندی کے نرخوں میں بڑا اضافہ ریکارڈ کیا گیا ہے۔ انٹرنیشنل مارکیٹ میں فی اونس سونا 157 ڈالر کے بڑے اضافے کے بعد 4 ہزار 814 ڈالر کی بلند ترین سطح پر پہنچ گیا ہے، جس کے اثرات مقامی صرافہ بازاروں پر بھی نمایاں طور پر دیکھے جا رہے ہیں۔

بین الاقوامی مارکیٹ کے تناسب سے پاکستان میں 24 قیراط فی تولہ سونا 15 ہزار 7 سو روپے مہنگا ہو کر 5 لاکھ 4 ہزار 162 روپے کی تاریخی سطح پر پہنچ گیا ہے۔ اسی طرح 10 گرام سونے کی قیمت میں 13 ہزار 460 روپے کا اضافہ ہوا، جس کے بعد اس کے نرخ 4 لاکھ 32 ہزار 237 روپے ہو گئے ہیں۔ دوسری جانب چاندی کی قیمتوں میں بھی تیزی دیکھی گئی ہے اور 24 قیراط فی تولہ چاندی 440 روپے کے اضافے کے بعد 8 ہزار 184 روپے پر پہنچ گئی ہے۔ معاشی ماہرین کا کہنا ہے کہ عالمی سطح پر ہونے والا یہ اضافہ سونے کی قیمتوں میں اب تک کا ایک بڑا ریکارڈ ہے، جس نے سرمایہ کاروں اور خریداروں کو حیران کر دیا ہے۔