پٹرولیم بحران کا خدشہ مسترد؛ ملک میں ایندھن کے وافر ذخائر موجود ہیں، وزیر خزانہ

وفاقی وزیر خزانہ محمد اورنگزیب کی زیرِ صدارت پٹرولیم کی نگرانی کے لیے قائم کابینہ کمیٹی کا اہم اجلاس منعقد ہوا، جس میں ملک میں ایندھن کی دستیابی اور سپلائی چین کا تفصیلی جائزہ لیا گیا۔ اجلاس کے دوران کمیٹی کو بریفنگ دی گئی کہ پاکستان میں خام تیل اور ریفائن شدہ پٹرولیم مصنوعات کے ذخائر کی صورتحال مکمل طور پر تسلی بخش ہے۔ حکام نے یقین دہانی کرائی کہ مارچ کی پٹرولیم ضروریات پہلے ہی محفوظ کر لی گئی ہیں جبکہ اپریل کے وسط تک ایندھن کی بلا تعطل فراہمی یقینی بنائی جا چکی ہے۔

وزیر خزانہ نے عوام اور تاجر برادری کو پیغام دیتے ہوئے کہا کہ پٹرولیم مصنوعات کی سپلائی مستحکم ہے، اس لیے گھبراہٹ میں خریداری (Panic Buying) یا غیر ضروری ذخیرہ اندوزی کی کوئی ضرورت نہیں۔ انہوں نے واضح کیا کہ حکومت عالمی منڈی سے سپلائی کے متبادل اور مزید ذرائع تلاش کرنے کے لیے متحرک ہے تاکہ طویل مدتی رسد برقرار رہے۔ کابینہ کمیٹی نے متعلقہ اداروں کو ہدایت کی کہ وہ مارکیٹ کی سرگرمیوں اور ذخائر کی کڑی نگرانی کریں تاکہ مصنوعی قلت پیدا کرنے والوں کے خلاف کارروائی کی جا سکے۔