تمباکو نوشی کرنے والے مردوں کے بچوں میں ذیابیطس کا خطرہ بڑھ سکتا ہے، تحقیق

امریکا کی کیلیفورنیا یونیورسٹی کی ایک تحقیق میں بتایا گیا ہے کہ تمباکو نوشی کی عادت ناقص صحت کی بڑی وجوہات میں سے ایک ہے اور اس سے نجات حاصل کر کے متعدد بیماریوں سے بچا جا سکتا ہے۔
تحقیق کے مطابق سگریٹ نوشی ترک کرنے سے ذیابیطس جیسے مرض سے بچاؤ میں بھی مدد مل سکتی ہے، خصوصاً مردوں کے لیے اس عادت سے دور رہنا نہایت ضروری قرار دیا گیا ہے۔
تحقیق کے دوران چوہوں پر تجربات کیے گئے جن سے معلوم ہوا کہ جب نر چوہے نکوٹین، جو تمباکو میں پایا جانے والا اہم جز ہے، استعمال کرتے ہیں تو اس کے اثرات ان کی اولاد کے مٹابولزم افعال پر بھی پڑتے ہیں۔
نتائج کے مطابق تمباکو نوشی کرنے والے مردوں کی اولاد میں ذیابیطس سے متاثر ہونے کا خطرہ بڑھ سکتا ہے۔
تجربات کے دوران یہ بھی دیکھا گیا کہ نر چوہوں کی اولاد میں انسولین کی سطح کم تھی جبکہ خالی پیٹ گلوکوز کی سطح بھی معمول سے کم پائی گئی۔
تحقیق میں جگر کے افعال میں بھی تبدیلیاں دیکھی گئیں جو موٹاپے اور ذیابیطس جیسے مسائل کے خطرات میں اضافے کا باعث بن سکتی ہیں۔
ماہرین کے مطابق تمباکو نوشی پہلے ہی کینسر، دل کے امراض اور دیگر بیماریوں کا خطرہ بڑھاتی ہے اور اب اس عادت کے ایک اور نقصان کی نشاندہی ہوئی ہے۔