اسلام آباد میں عورت مارچ کے دوران فرزانہ باری سمیت 14 افراد گرفتار

اسلام آباد: وفاقی دارالحکومت میں عورت مارچ کے دوران پولیس نے گیارہ خواتین اور تین مردوں کو گرفتار کر لیا، گرفتار ہونے والوں میں سماجی کارکن فرزانہ باری بھی شامل ہیں۔

پولیس حکام کے مطابق گرفتار افراد کو تحویل میں لینے کے بعد خواتین کو وویمن پولیس اسٹیشن منتقل کر دیا گیا ہے۔

اسلام آباد پولیس کا کہنا ہے کہ شہر میں دفعہ 144 نافذ ہے اور اس کی خلاف ورزی کرنے والوں کے خلاف قانونی کارروائی عمل میں لائی گئی ہے۔

پولیس کے مطابق دفعہ 144 کے تحت عوامی اجتماعات اور جلوسوں پر پابندی عائد ہے، تاہم اس کے باوجود عورت مارچ کے شرکا کی جانب سے اجتماع کیا گیا جس پر کارروائی کی گئی۔

ضلعی انتظامیہ کا کہنا ہے کہ عورت مارچ کے انعقاد کے لیے کوئی اجازت نامہ جاری نہیں کیا گیا تھا۔ انتظامیہ کے مطابق مظاہرین کی جانب سے سیکٹر ایف سکس سے ڈی چوک تک مارچ کا اعلان کیا گیا تھا۔

حکام کے مطابق شہر میں امن و امان برقرار رکھنے اور قانون کی عملداری یقینی بنانے کے لیے کارروائی کی گئی۔