پیٹرولیم ڈیلرز کی ہڑتال کی خبریں بے بنیاد، سپلائی بلا تعطل جاری رہے گی: اوگرا

 آئل اینڈ گیس ریگولیٹری اتھارٹی کے ترجمان نے پیٹرولیم ڈیلرز کی مبینہ ہڑتال سے متعلق گردش کرنے والی خبروں کو بے بنیاد قرار دے دیا ہے۔ ترجمان کے مطابق سوشل میڈیا پر پھیلائی جانے والی اطلاعات جعلی ہیں اور کسی بھی پیٹرولیم ایسوسی ایشن نے ہڑتال کا اعلان نہیں کیا۔

دوسری جانب پیٹرولیم ڈویژن نے بھی یکم مئی سے پیٹرول پمپس کی بندش کی خبروں کو مسترد کرتے ہوئے واضح کیا ہے کہ ملک بھر میں پیٹرولیم مصنوعات کی فراہمی بلا تعطل جاری رہے گی۔ اعلامیے کے مطابق مشرق وسطیٰ میں کشیدگی کے باوجود سپلائی چین متاثر نہیں ہوئی اور آئندہ بھی تسلسل برقرار رکھا جائے گا۔

ادھر عالمی سطح پر ایران کے خلاف ممکنہ مزید کارروائیوں، ناکہ بندی اور آبنائے ہرمز کی صورتحال کے باعث تیل کی قیمتوں میں اتار چڑھاؤ جاری ہے۔ تاہم حالیہ اضافے کے بعد عالمی منڈی میں خام تیل کی قیمتوں میں کمی دیکھنے میں آئی ہے۔

رپورٹ کے مطابق برینٹ خام تیل ایک سو چوبیس ڈالر سے کم ہو کر ایک سو چودہ ڈالر فی بیرل پر آ گیا، جبکہ ڈبلیو ٹی آئی خام تیل ایک سو دس ڈالر سے کم ہو کر ایک سو چار ڈالر فی بیرل پر ٹریڈ کر رہا ہے۔