متحدہ عرب امارات نے اپنے شہریوں کو ایران، لبنان اور عراق کے سفر نہ کرنے کی ہدایت کردی

متحدہ عرب امارات کی وزارت خارجہ نے علاقائی صورتحال میں پیش رفت کے پیش نظر اہم فیصلہ کرتے ہوئے اپنے شہریوں کے لیے ایران، لبنان اور عراق کے سفر پر پابندی عائد کر دی ہے۔

وزارت خارجہ کی جانب سے جاری بیان میں کہا گیا ہے کہ موجودہ حالات کے پیش نظر متحدہ عرب امارات کے شہریوں کو ان ممالک کے سفر سے روک دیا گیا ہے تاکہ ان کی حفاظت اور سلامتی کو یقینی بنایا جا سکے۔

بیان میں مزید کہا گیا ہے کہ جو شہری اس وقت ایران، لبنان اور عراق میں موجود ہیں، انہیں فوری طور پر واپس متحدہ عرب امارات پہنچنے کی ہدایت کی جاتی ہے۔

وزارت خارجہ نے واضح کیا ہے کہ بیرون ملک موجود اپنے شہریوں کی فلاح و بہبود کی نگرانی ریاست کی اولین ترجیح ہے، اور اس مقصد کے لیے تمام ضروری احتیاطی اقدامات کیے جا رہے ہیں۔