صدر ٹرمپ کا جنگ بندی ختم کرنے اور ایران پر دوبارہ حملوں کا عندیہ

واشنگٹن: امریکی صدر ڈونلڈ ٹرمپ نے ایران کے ساتھ جاری کشیدگی کے تناظر میں جنگ بندی کے خاتمے اور ممکنہ طور پر دوبارہ حملے شروع کرنے کا عندیہ دے دیا ہے۔

اوول آفس میں صحافیوں سے گفتگو کرتے ہوئے امریکی صدر نے جنگ بندی کے مستقبل سے متعلق سوال پر کہا کہ انہیں اس کی فوری ضرورت محسوس نہیں ہوتی، تاہم حالات کے مطابق ایسا کیا جا سکتا ہے۔ انہوں نے کہا کہ ایران کے خلاف فوجی کارروائی پہلے ہی شروع کر دینی چاہیے تھی۔

صدر ٹرمپ نے دعویٰ کیا کہ امریکا نے ایران کی نوے فیصد میزائل فیکٹریاں تباہ کر دی ہیں اور عائد پابندیاں مؤثر ثابت ہو رہی ہیں، جس کے باعث ایران کی معیشت دباؤ کا شکار ہے۔ انہوں نے واضح کیا کہ ایران کو جوہری ہتھیار رکھنے کی اجازت نہیں دی جا سکتی اور ایران کسی معاہدے کے لیے بے تاب ہے۔

انہوں نے ایرانی قیادت کے حوالے سے غیر یقینی صورتحال کو بھی ایک بڑا مسئلہ قرار دیا اور کہا کہ واضح نہیں کہ وہاں اصل قیادت کس کے پاس ہے۔