چین میں ایک شخص نے بطخ کو کاٹا تو اس میں سے لاکھوں روپوں کا سونا نکل آیا

چین میں ایک حیران کن واقعہ پیش آیا جہاں کھانے کے لیے ذبح کی گئی بطخ نے اپنے مالک کو اچانک امیر بنا دیا۔
وسطی چین کے صوبہ ہونان کے علاقے لونگ ہوئی (Longhui) سے تعلق رکھنے والے ایک شخص لیو نے جب بطخ کو ذبح کر کے اس کا گوشت صاف کرنا شروع کیا تو اسے بطخ کے معدے میں چمکتے ہوئے ذرات نظر آئے۔
بعد ازاں جب ان ذرات کی جانچ کی گئی تو معلوم ہوا کہ وہ واقعی خالص سونا ہے۔
رپورٹس کے مطابق بطخ کے اندر سے مجموعی طور پر 10 گرام سونا ملا جس کی مالیت تقریباً 12 ہزار یوان (یعنی چار لاکھ 86 ہزار پاکستانی روپے سے زائد) بنتی ہے۔
لیو کے والد کے مطابق ان کے نزدیک یہ دریافت چینی نئے سال کے موقع پر خوش قسمتی کی علامت ہے۔
لیو نے بتایا کہ اس نے بطخ کو ایک دریا کے قریب پالا تھا جہاں ماضی میں سونے کی کان موجود تھی۔ امکان ظاہر کیا جا رہا ہے کہ بطخ نے مٹی کے ساتھ سونے کے باریک ذرات بھی نگل لیے ہوں گے جو اس کے جسم میں ہضم نہ ہو سکے اور آنتوں میں جمع ہو گئے۔
لیو کا کہنا ہے کہ ماضی میں بھی ان کے گاؤں میں لوگوں کو بطخوں کے اندر سونے کے ذرات ملنے کے واقعات پیش آ چکے ہیں، تاہم اتنی زیادہ مقدار میں سونا ملنا انتہائی نایاب ہے۔
مقامی افراد کے مطابق اس علاقے کے دریا میں ماضی میں سونے کی تلاش کی جاتی تھی، تاہم بعد میں حکومت نے وہاں سونا نکالنے پر پابندی عائد کر دی تھی۔