تعمیراتی کام کے دوران تقریباً 2 ہزار سال قدیم رومی مقام دریافت

جرمنی میں ایک تعمیراتی منصوبے کے دوران تاریخ کا ایک نیا باب کھل گیا ہے۔ میوزیم کی نئی عمارت کے لیے بنیادوں کی کھدائی کے دوران ماہرینِ آثارِ قدیمہ نے پہلی صدی عیسوی سے تعلق رکھنے والا ایک قدیم رومی مقام دریافت کیا ہے۔ ابتدائی تحقیقات کے مطابق یہاں سے ایک قدیم قربان گاہ، وسیع عمارتی ڈھانچے اور ایک پتھر کا زینہ ملا ہے، جو ممکنہ طور پر رومی گورنر کی رہائش گاہ کو دریائے رائن سے ملاتا تھا۔ ماہرین کا کہنا ہے کہ یہ مقام مذہبی اور انتظامی اہمیت کا حامل رہا ہو گا، جس سے رومی طرزِ زندگی کو سمجھنے میں مدد ملے گی۔