مریخ کا پانی کہاں گیا؟ نئی تحقیق نے حیران کن انکشاف کر دیا

سائنسدانوں نے مریخ کے بنجر اور خشک ہونے کے اربوں سال پرانے راز سے پردہ اٹھا دیا ہے۔ سائنسی جریدے ‘کمیونیکیشن ارتھ اینڈ انوائرنمنٹ’ میں 2026 کے اوائل میں شائع ہونے والی ایک نئی تحقیق کے مطابق، مریخ پر پانی کے غائب ہونے کی سب سے بڑی وجہ وہاں آنے والے شدید مقامی طوفان ہیں۔
مریخ پر آنے والے مختصر لیکن شدید مقامی طوفان پانی کے بخارات کو سیارے کی اوپری فضا میں دھکیل دیتے ہیں۔
جب پانی کے بخارات اوپری فضا میں پہنچتے ہیں، تو وہاں سے ہائیڈروجن گیس ٹوٹ کر خلا کی جانب خارج ہو جاتی ہے، جس کے نتیجے میں سیارہ مستقل طور پر اپنا پانی کھو دیتا ہے۔
مریخ کی سطح پر خشک ندیوں اور معدنیات کے آثار اس بات کی تصدیق کرتے ہیں کہ ماضی میں یہاں پانی وافر مقدار میں موجود تھا، لیکن اس ماحولیاتی عمل نے اسے آہستہ آہستہ صحرا میں بدل دیا۔
سائنسدانوں کا ماننا ہے کہ یہ دریافت مریخ کے ماحولیاتی ارتقا کو سمجھنے کے لیے ایک اہم سنگ میل ہے۔ اس سے یہ بھی ثابت ہوتا ہے کہ کسی سیارے پر ہونے والے چھوٹے موسمی واقعات بھی طویل مدت میں اس کے پورے ماحول کو مکمل طور پر تبدیل کرنے کی طاقت رکھتے ہیں۔