ملک بھر کی جامعات میں اے آئی کورس لازمی قرار

ہائر ایجوکیشن کمیشن (ایچ ای سی) نے ملک بھر کی تمام سرکاری و نجی جامعات اور ڈگری ایوارڈنگ اداروں میں انڈر گریجویٹ اور پوسٹ گریجویٹ سطح پر مصنوعی ذہانت (AI) کو لازمی مضمون کے طور پر شامل کرنے کا حکم جاری کر دیا ہے۔

ایچ ای سی کے ایگزیکٹیو ڈائریکٹر ڈاکٹر ضیا الحق کی جانب سے تمام وائس چانسلرز کو ارسال کیے گئے مراسلے کے مطابق، یہ کورس 3 کریڈٹ آورز پر مشتمل ہوگا جس کا باقاعدہ اطلاق رواں تعلیمی سیشن 2026 سے ہوگا۔ مراسلے میں کہا گیا ہے کہ 21ویں صدی کے بدلتے ہوئے عالمی منظرنامے میں تعلیم، صحت، معیشت اور انتظامی امور میں اے آئی کی اہمیت سے انکار ممکن نہیں، اس لیے پاکستانی طلبہ کو اس جدید ٹیکنالوجی کے ذمہ دارانہ اور اخلاقی استعمال سے روشناس کرانا وقت کی ضرورت ہے۔

ایچ ای سی کی ہدایات کے مطابق جامعات اس کورس کو اختیاری مضمون، بین الشعبہ جاتی (Inter-disciplinary) کورس یا پروگرام کے ڈھانچے میں شامل کسی متعلقہ مضمون کے طور پر پڑھا سکتی ہیں، تاہم کورس کے نصاب میں اے آئی کے بنیادی تصورات کا ہونا لازمی ہے۔ اس اقدام کا مقصد پاکستانی گریجویٹس کو عالمی مارکیٹ کی ضروریات کے مطابق تیار کرنا ہے۔