انڈہ صحیح ہے یا خراب؟ گھر بیٹھے جاننے کا آسان طریقہ

ناشتہ ہو یا کسی خاص پکوان کی تیاری، انڈہ ہماری روزمرہ خوراک کا اہم حصہ بن چکا ہے۔ تاہم اکثر یہ سوال پیدا ہوتا ہے کہ کئی ہفتوں سے رکھے گئے انڈے اب بھی قابلِ استعمال ہیں یا نہیں۔

اکثر افراد صرف پیکنگ پر درج تاریخ دیکھ کر یہ سمجھ لیتے ہیں کہ انڈے خراب ہو چکے ہوں گے، لیکن ماہرین غذائیت کے مطابق اگر انڈوں کو مناسب درجہ حرارت پر محفوظ کیا جائے تو وہ 3 سے 5 ہفتوں تک قابلِ استعمال رہ سکتے ہیں۔ اس لیے صرف وقت گزر جانے کی بنیاد پر انہیں ضائع کرنا ضروری نہیں۔

ماہرین کا مشورہ ہے کہ انڈوں کو فریج کے دروازے میں رکھنے کے بجائے اندرونی حصے میں رکھا جائے، جہاں درجہ حرارت نسبتاً مستحکم اور ٹھنڈا رہتا ہے۔ دروازہ بار بار کھلنے سے درجہ حرارت میں تبدیلی آتی رہتی ہے، جو انڈوں کی کوالٹی متاثر کر سکتی ہے۔

اصل پریشانی اس وقت ہوتی ہے جب انڈہ پکانے کے لیے توڑا جائے اور وہ خراب نکل آئے۔ ایسی صورت میں نہ صرف انڈہ ضائع ہوتا ہے بلکہ اگر وہ کسی تیار ہوتی ڈش میں شامل ہو چکا ہو تو پوری ڈش بھی پھینکنی پڑ سکتی ہے۔

پانی کے ذریعے تازگی جانچنے کا سادہ طریقہ

انڈے کو توڑے بغیر اس کی تازگی جانچنے کا ایک نہایت آسان گھریلو طریقہ موجود ہے، جس کے لیے صرف ایک گلاس ٹھنڈا پانی درکار ہوتا ہے۔

طریقہ کار:

انڈے کو احتیاط سے پانی میں رکھیں۔

اگر انڈہ نیچے جا کر پہلو کے بل لیٹ جائے تو وہ تازہ ہے۔

اگر وہ نیچے چلا جائے مگر سیدھا کھڑا ہو جائے تو وہ قابلِ استعمال تو ہے، مگر کچھ پرانا ہو چکا ہے۔

اگر انڈہ پانی کی سطح پر تیرنے لگے تو یہ واضح علامت ہے کہ وہ خراب ہو چکا ہے اور اسے استعمال نہیں کرنا چاہیے۔

ماہرین کے مطابق وقت کے ساتھ انڈے کے اندر ہوا کی مقدار بڑھتی جاتی ہے، جس سے اس کی کثافت کم ہو جاتی ہے۔ یہی وجہ ہے کہ پرانا انڈہ پانی میں تیرنے لگتا ہے۔

یہ سادہ تجربہ نہ صرف خوراک کے ضیاع سے بچا سکتا ہے بلکہ روزمرہ زندگی میں ایک مفید گھریلو تدبیر بھی ثابت ہو سکتا ہے۔