جواد احمد نے موجودہ دور کے گلوکاروں کو لالچی قرار دے دیا

نوّے کی دہائی کے معروف پاکستانی گلوکار اور موجودہ سیاستدان جواد احمد اپنی متنازع بیانات کی وجہ سے خبروں میں ہیں۔

موسیقی سے کنارہ کشی اختیار کرنے کے بعد، جواد احمد اکثر سیاسی شخصیات، شوبز ستاروں اور ہم عصروں پر تنقیدی گفتگو کرتے نظر آتے ہیں، جس پر انہیں سخت تنقید کا سامنا بھی رہا ہے۔

حال ہی میں ایک نیوز شو میں انہوں نے مشہور گلوکاروں کو ’لالچی‘ قرار دیا۔

جواد احمد کا کہنا تھا کہ انہوں نے سیاسی وابستگی کی وجہ سے موسیقی کو خیرباد کہا اور اب گائیکی سے کوئی آمدن حاصل نہیں کرتے، کیونکہ ان کے نزدیک اس شعبے میں مالی لالچ نہیں ہونا چاہیے۔

انہوں نے مزید دعویٰ کیا کہ ان کے دور میں فنکار عوام کے لیے ہر جگہ دستیاب تھے اور ان کے کیسٹ ریکارڈ توڑ فروخت ہوتے تھے، یہاں تک کہ بھارت میں بھی لوگ ان کی کامیابی پر حیران رہ جاتے تھے۔