سٹاک مارکیٹ میں شدید مندی، انڈیکس ایک لاکھ 64 ہزار پوائنٹس کی حد کھو بیٹھا

پاکستان سٹاک ایکسچینج (PSX) میں کاروباری ہفتے کے چوتھے روز شدید مندی کا رجحان دیکھنے میں آیا ہے۔ اگرچہ دن کے آغاز پر مارکیٹ میں معمولی تیزی ریکارڈ کی گئی تھی اور کے ایس ای-100 انڈیکس 250 پوائنٹس کے اضافے سے 1 لاکھ 66 ہزار 180 پوائنٹس کی سطح پر بھی پہنچا، تاہم ٹریڈنگ کے دوران فروخت کا شدید دباؤ بڑھنے سے بازارِ حصص میں زبردست مندی چھا گئی۔ کاروبار کے اختتام پر 100 انڈیکس 2006 پوائنٹس کی نمایاں کمی کے ساتھ 1 لاکھ 63 ہزار 924 پوائنٹس کی سطح پر بند ہوا۔ واضح رہے کہ گزشتہ روز مارکیٹ میں مثبت رجحان رہا تھا اور انڈیکس 779 پوائنٹس کے اضافے سے 1 لاکھ 65 ہزار 930 پر بند ہوا تھا، جسے آج کی شدید گراوٹ نے مکمل طور پر زائل کر دیا ہے۔