ممتاز شاعر مظفر وارثی کو دنیا سے رخصت ہوئے 15برس بیت گئے

ممتاز شاعر، نعت گو اور حمدیہ کلام کے معروف خالق مظفر وارثی کو دنیا سے رخصت ہوئے 15 برس بیت گئے۔ حمد ہو یا نعت، غزل ہو یا گیت، ہر صنف سخن میں انہوں نے اپنے فن کا لوہا منوایا اور ادبِ اسلامی کو ناقابلِ فراموش خدمات فراہم کیں۔

مظفر وارثی 23 دسمبر 1933ء کو میرٹھ میں پیدا ہوئے، ان کا اصل نام محمد مظفرالدین صدیقی تھا۔ قیامِ پاکستان کے بعد انہوں نے لاہور میں سکونت اختیار کی جہاں جلد ہی وہ ممتاز شعرا میں شمار ہونے لگے۔ ان کی لازوال نعتوں اور حمدوں نے انہیں بے پناہ شہرت دلائی، جن میں یارحمت اللعالمین، ورفعنالک ذکرک، تو کجا من کجا اور حمد کوئی تو ہے جو نظام ہستی چلا رہا ہے نمایاں ہیں۔

مظفر وارثی نے فلمی دنیا میں بھی نمایاں خدمات انجام دیں۔ ان کے لکھے گیتوں نے عوام میں بے حد مقبولیت حاصل کی، جن میں کیا کہوں اے دنیا والو کیا کہوں میں، مجھے چھوڑ کر اکیلا کہیں دور جانے والے اور یاد کرتا ہے زمانہ انہی انسانوں کو شامل ہیں۔

ان کی فنی اور ادبی خدمات کے اعتراف میں حکومتِ پاکستان نے انہیں صدارتی تمغہ برائے حسنِ کارکردگی سے نوازا، جبکہ انہیں فصیح الہند اور شرف الشعرا کے خطابات بھی عطا کیے گئے۔ مظفر وارثی 28 جنوری 2011ء کو لاہور میں انتقال کر گئے تھے۔