کاش اپنا گھر بچوں کے نام نہ کیا ہوتا، گلوکارہ ترنم ناز

پاکستان کی معروف اور سینئر کلاسیکل و غزل گلوکارہ ترنم ناز نے کہا ہے کہ اپنی زندگی کی سب سے بڑی غلطی اپنے ہاتھ سے بنایا ہوا گھر بچوں کے نام منتقل کرنا تھا، جس پر اب انہیں شدید پچھتاوا ہے۔

ایک ٹی وی پروگرام میں گفتگو کرتے ہوئے ترنم ناز نے بتایا کہ انہوں نے اپنی محنت کی کمائی سے زمین خریدی اور شوق سے گھر تعمیر کروایا۔ اُس وقت ان کے بچے کم عمر تھے اور انہوں نے یہ سوچ کر جائیداد بچوں کے نام کر دی کہ اس سے کوئی فرق نہیں پڑتا کہ گھر کس کے نام ہے۔

انہوں نے کہا کہ وقت گزرنے کے ساتھ جب بچے بڑے ہوئے اور شادی کے بعد اسی گھر میں اپنا حصہ طلب کرنے لگے تو انہیں احساس ہوا کہ یہ فیصلہ درست نہیں تھا۔ ترنم ناز کے مطابق اگر جائیداد ان کے اپنے نام ہوتی تو والدین کی حیثیت اور وقار مختلف ہوتا۔

ان کا کہنا تھا کہ یہ تجربہ ان کے لیے ایک بڑا سبق ہے جس سے دیگر والدین کو بھی سیکھنا چاہیے۔

واضح رہے کہ ترنم ناز پاکستان کی نامور کلاسیکل و غزل گلوکارہ ہیں، جو استاد عاشق حسین کی شاگردہ رہ چکی ہیں۔ ان کی آواز میں لیجنڈری گلوکارہ مادام نور جہاں کی جھلک محسوس کی جاتی ہے، جبکہ حکومتِ پاکستان انہیں پرائیڈ آف پرفارمنس سے بھی نواز چکی ہے۔