اسلام کی بقا آسائشوں میں نہیں، آزمائشوں سے گزرنا پڑتا ہے: مولانا فضل الرحمان

سربراہ جمعیت علمائے اسلام (ف) مولانا فضل الرحمان نے کہا ہے کہ اسلام کی بقا آرام و آسائش میں نہیں بلکہ قربانی اور آزمائشوں سے گزرنے میں ہے۔ صوبائی دارالحکومت میں ایک تقریب سے خطاب کرتے ہوئے انہوں نے کہا کہ دنیا میں آنے والا ہر شخص ایک دن رخصت ہو جاتا ہے، اس لیے اصل کامیابی نیت کی درستگی میں ہے۔

مولانا فضل الرحمان کا کہنا تھا کہ انسان اپنے اعمال سے خود کو نقصان بھی پہنچا سکتا ہے، جبکہ ہر عمل کی قبولیت کا دارومدار نیت پر ہوتا ہے۔ انہوں نے کہا کہ اسلام اعتدال کا دین ہے، کیونکہ افراط و تفریط معاشرے میں بگاڑ پیدا کرتی ہے۔

انہوں نے مزید کہا کہ حضور اکرم ﷺ معلم بھی ہیں اور مربی بھی، تعلیم و تربیت نبوت کا حصہ ہے۔ ہمارے مدارس میں ادب کی وہ تعلیم دی جاتی ہے جو دنیا کی بڑی جامعات میں بھی ناپید ہے۔ آج نوجوانوں کو دانستہ طور پر اپنے بزرگوں اور اسلاف سے دور کیا جا رہا ہے۔