کراچی میں یوم شہدائے سندھ پولیس ریس، ہزاروں افراد کی شرکت

شہرِ قائد کراچی میں یومِ شہدائے سندھ پولیس کے موقع پر ساحلِ سمندر پر 05 کلومیٹر طویل واک اور ریس کا شاندار انعقاد کیا گیا، جس میں 05 ہزار سے زائد شہریوں نے بھرپور جوش و خروش کے ساتھ شرکت کی۔ ریس میں مردوں، خواتین، بچوں اور زندگی کے مختلف شعبوں سے تعلق رکھنے والے افراد نے سندھ پولیس کے شہداء کو خراجِ عقیدت پیش کرنے کے لیے دوڑ میں حصہ لیا۔ منتظمین کے مطابق اس تقریب کا بنیادی مقصد پولیس کے شہداء کی لازوال قربانیوں کو تسلیم کرنا، صحت مندانہ سرگرمیوں کا فروغ اور عوام اور پولیس کے درمیان تعلقات کو مزید استوار کرنا تھا۔ تقریب کے اختتام پر نمایاں پوزیشنز حاصل کرنے والے دلاوروں میں نقد انعامات بھی تقسیم کیے گئے۔