شکارپور کی قومی شاہراہ پر ہولناک حادثہ، 2 نوجوان جاں بحق، ٹینکر ڈرائیور گرفتار

ضلع شکارپور کے علاقے ہمایوں شریف کی حدود میں قومی شاہراہ پر کار، آئل ٹینکر اور موٹر سائیکل کے درمیان خوفناک تصادم کے نتیجے میں دو نوجوان موقع پر ہی جاں بحق ہو گئے۔

ریسکیو ذرائع کے مطابق حادثے کی اطلاع ملتے ہی پولیس اور ریسکیو ٹیمیں فوراً جائے وقوعہ پر پہنچیں اور لاشوں کو ضروری قانونی و طبی کارروائی کے لیے ہسپتال منتقل کیا۔ پولیس نے بتایاک ہ جاں بحق ہونے والے افراد کی شناخت عامر کٹو اور میر کٹو کے نام سے ہوئی ہے۔

حادثے کے فوراً بعد شدید غم و غصے میں مبتلا مشتعل افراد نے آئل ٹینکر کو آگ لگانے کی کوشش کی، تاہم پولیس نے موقع پر پہنچ کر حالات کو قابو میں کیا اور ٹینکر کے ڈرائیور کو گرفتار کر لیا۔ پولیس حکام کا مزید کہنا ہے کہ حادثے میں ملوث کار کا ڈرائیور موقع سے گاڑی سمیت فرار ہونے میں کامیاب ہو گیا جس کی تلاش اور گرفتاری کے لیے چھاپے مارے جا رہے ہیں۔ واقعے کی مزید تفتیش جاری ہے۔