آزاد کشمیر کے پہلے مرحلے کے انتخابات میں دھاندلی ہوئی، بائیکاٹ کی تجاویز مسترد کر کے میدان میں رہیں گے: ندیم افضل چن

پاکستان پیپلز پارٹی کے مرکزی سیکرٹری اطلاعات ندیم افضل چن نے اسلام آباد میں پریس کانفرنس کرتے ہوئے آزاد جموں و کشمیر کے انتخابات کو غیر شفاف قرار دیتے ہوئے کہا ہے کہ پہلے مرحلے میں بدترین دھاندلی کی گئی اور مخصوص پولنگ اسٹیشنز پر غیر معمولی کاسٹنگ دکھائی گئی۔ انہوں نے کہا کہ چیئرمین بلاول بھٹو زرداری کی بہترین مہم کے باعث مسلم لیگ (ن) کو شکست کا خوف تھا، جس کی وجہ سے انتخابی عمل کو متنازع بنایا گیا۔ ندیم افضل چن نے انکشاف کیا کہ 04 حلقوں میں دھاندلی کے واضح اور ٹھوس ثبوت حکومت کو فراہم کیے گئے ہیں تاہم مسلم لیگ (ن) نے ابھی تک کوئی جواب نہیں دیا۔ انہوں نے بتایا کہ پارٹی میں انتخابات کے دوسرے مرحلے کے بائیکاٹ کی تجاویز موجود تھیں، تاہم مرکزی قیادت نے جمہوریت اور ووٹ کی طاقت پر یقین رکھتے ہوئے بائیکاٹ کی رائے کو مسترد کر دیا ہے۔ انہوں نے سیالکوٹ اور جھنگ کے حلقوں میں “گلو بٹ ماڈل” کے استعمال کے خدشات کا اظہار کرتے ہوئے الیکشن کمیشن سے شفافیت یقینی بنانے کا مطالبہ کیا۔