پاکستان کے 2 مزید کرکٹرز کا لنکا پریمئیر لیگ میں معاہدہ، شاہین شاہ آفریدی دستبردار

لنکا پریمیئر لیگ (ایل پی ایل) کے آئندہ ایڈیشن کے لیے پاکستان کے دو مزید کھلاڑیوں نے مختلف فرنچائزز کے ساتھ معاہدے طے کر لیے ہیں، جبکہ قومی ٹیم کے اسٹار فاسٹ بولر شاہین شاہ آفریدی نے ذاتی وجوہات کی بنا پر ایونٹ سے دستبرداری کا فیصلہ کیا ہے۔

نوجوان دھماکے دار بلے باز خواجہ نافع ‘جافنا کنگز’ کی نمائندگی کریں گے، انہیں افغانستان کے ابراہیم زدران کے متبادل کے طور پر اسکواڈ کا حصہ بنایا گیا ہے۔ دوسری جانب تجربہ کار آل راؤنڈر افتخار احمد ‘دمبولا سکسرز’ کا رخ کریں گے، جنہیں افغان فاسٹ بولر فضل حق فاروقی کی جگہ ٹیم میں شامل کیا گیا ہے۔ ادھر ‘کینڈی رائلز’ کی انتظامیہ نے شاہین آفریدی کی عدم دستیابی کی تصدیق کی ہے؛ ایل پی ایل ترجمان کے مطابق شاہین نے ذاتی مصروفیات اور وجوہات کا حوالہ دیتے ہوئے لیگ میں شرکت سے معذرت کی ہے۔