مزید جنگی جہاز نہ بھیجا تو اسرائیل کے بجائے امریکی دفاع کے انتخاب پر مجبور ہوں گے: امریکی جنرل

امریکی اخبار واشنگٹن پوسٹ نے رپورٹ کیا ہے کہ یورپ میں تعینات امریکی فوج کی یورپیئن کمانڈ کے سربراہ جنرل الیکسس گرینکیوچ نے پینٹاگون کو نجی طور پر تحریری طور پر خبردار کیا ہے کہ ان کے پاس اسرائیل کو بیلسٹک میزائل حملوں سے بچانے کے لیے درکار بحری وسائل ناکافی ہیں۔ جنرل گرینکیوچ کے مطابق اگر انہیں مزید ایک ڈسٹرائر بحری جہاز فراہم نہ کیا گیا تو انہیں امریکہ کے اپنے دفاع اور اسرائیل کے دفاع میں سے کسی ایک کا انتخاب کرنا پڑے گا۔ رپورٹ کے مطابق صدر ڈونلڈ ٹرمپ کی جانب سے ایران کی بحری ناکہ بندی کے احکام کے بعد امریکی بحریہ شدید دباؤ کا شکار ہے۔ اس وقت مشرقی بحیرہ روم میں تعینات امریکی ڈسٹرائرز جو طاقتور ریڈارز اور اینٹی میزائل سسٹم سے لیس ہیں، اسرائیل کو ایران اور یمن کے حوثی باغیوں کے میزائل حملوں سے بچانے میں کلیدی کردار ادا کر رہے ہیں، تاہم نیٹو اتحاد کی ذمہ داریوں کے باعث ان پر سیکیورٹی بوجھ مزید بڑھ گیا ہے۔