اداکارہ رحمہ زمان کی رخصتی کی تیاریاں، ہلدی اور ڈھولکی کی تصاویر وائرل

پاکستان شوبز انڈسٹری کی ابھرتی ہوئی اداکارہ رحمہ زمان کی رخصتی سے قبل شادی کی تقریبات کا باقاعدہ آغاز ہو چکا ہے۔ اداکارہ نے گزشتہ روز فوٹوز اینڈ ویڈیوز شیئرنگ پلیٹ فارم انسٹاگرام پر اپنی ہلدی اور ڈھولکی کی تقریبات کی خوبصورت تصاویر شیئر کیں، جو دیکھتے ہی دیکھتے مداحوں کی توجہ کا مرکز بن گئیں۔

’منت مراد‘، ’محشر‘، ’میرے سپنے‘، ’بےرخی‘، ’میرے بن جاؤ‘ اور ’شطرنج‘ جیسے مقبول ڈراموں میں اپنی اداکاری کے جوہر دکھانے والی رحمہ زمان 2024 میں نکاح کے بندھن میں بندھ چکی تھیں اور اب جلد رخصت ہونے والی ہیں۔ ان کا نکاح برطانیہ میں مقیم ایک نیورو سرجن سے ہوا تھا، جبکہ شادی کی سادہ مگر پروقار تقریب قریبی دوستوں اور اہلِ خانہ کی موجودگی میں منعقد کی گئی تھی۔

ہلدی کی تقریب میں رحمہ زمان نے گلابی اور فیروزی کشیدہ کاری والی خوبصورت لمبی قمیص کے ساتھ سادہ فلیپر زیب تن کیا، جبکہ سادہ پونی ٹیل اور پھولوں کے حسین زیورات نے ان کے انداز کو مزید نکھار دیا۔ تصاویر میں اداکارہ کو اپنے والدین اور چھوٹے بھائی کے ساتھ خوشگوار موڈ میں دیکھا جا سکتا ہے۔

ڈھولکی کی تقریب میں رحمہ زمان دھانی رنگ کے دیدہ زیب لباس میں جلوہ گر ہوئیں، جس پر مکمل دبکہ کڑھائی کی گئی تھی۔ سادہ مگر دلکش انداز نے مداحوں کو خوب متاثر کیا، جس کے بعد سوشل میڈیا پر انہیں شادی کی مبارکبادیں دینے کا سلسلہ بھی جاری ہے۔