نواک جوکووچ ومبلڈن کے پری کوارٹر فائنل میں پہنچ گئے

سربیا سے تعلق رکھنے والے عالمی شہرت یافتہ ٹینس اسٹار اور سابق چیمپئن نواک جوکووچ نے ومبلڈن ٹینس ٹورنامنٹ کے پری کوارٹر فائنل کے لیے کوالیفائی کر لیا ہے، جبکہ ویمنز سنگلز میں جاپان کی ناؤمی اوساکا بھی اگلے مرحلے میں پہنچنے میں کامیاب ہو گئی ہیں۔

لندن میں جاری سال کے تیسرے گرینڈ سلیم ومبلڈن ٹینس ٹورنامنٹ کے مینز سنگلز راؤنڈ آف 32 (ٹاپ 32) کے ایک اہم میچ میں نواک جوکووچ کا مقابلہ فرانس کے ٹینس کھلاڑی آرتھر رینڈرنیک سے ہوا۔ جوکووچ نے شاندار کھیل کا مظاہرہ کرتے ہوئے پہلے دو سیٹس 5-7 اور 4-6 سے اپنے نام کر لیے۔ تاہم، تیسرے سیٹ میں فرانسیسی کھلاڑی آرتھر رینڈرنیک نے شاندار کم بیک کیا اور جوکووچ کو یکطرفہ مقابلے کے بعد 1-6 سے شکست دے کر میچ میں امیدیں برقرار رکھیں۔ چوتھے سیٹ میں دونوں کھلاڑیوں کے درمیان سخت مقابلہ دیکھنے کو ملا، لیکن جوکووچ نے اپنے تجربے کا فائدہ اٹھاتے ہوئے ٹائی بریکر پر کامیابی حاصل کی اور میچ جیت کر پری کوارٹر فائنل میں جگہ پکی کر لی۔

دوسری جانب، ویمنز سنگلز کے میچ میں جاپان کی اسٹار کھلاڑی ناؤمی اوساکا نے بھی شاندار کارکردگی کا مظاہرہ کیا۔ انہوں نے آسٹریلیا کی ڈاریا کو اسٹریٹ سیٹس میں شکست دی۔ ناؤمی اوساکا کی جیت کا اسکور 1-6 اور 3-6 رہا۔ اس یکطرفہ اور آسان فتح کے ساتھ ہی جاپانی کھلاڑی نے بھی ومبلڈن کے پری کوارٹر فائنل کے لیے کوالیفائی کر لیا ہے۔