گڈز ٹرانسپورٹرز کی ہڑتال سے صنعتی سرگرمیاں متاثر، ایف پی سی سی آئی کا ریڈ الرٹ

ملک بھر میں گڈز ٹرانسپورٹرز کی جاری ہڑتال کے باعث صنعتی سرگرمیاں شدید متاثر ہونے کا خدشہ پیدا ہو گیا ہے اور کارخانوں کے لیے خام مال کی فراہمی میں سخت قلت پیدا ہونا شروع ہو گئی ہے۔ صورتحال کی سنگینی کو دیکھتے ہوئے فیڈریشن آف پاکستان چیمبرز آف کامرس اینڈ انڈسٹری (FPCCI) نے تشویش کا اظہار کرتے ہوئے ‘ریڈ الرٹ’ جاری کر دیا ہے۔

ایف پی سی سی آئی کے سینئر نائب صدر ثاقب فیاض مگوں نے اپنے ویڈیو بیان میں کہا کہ مال بردار گاڑیوں کے پہیے جام ہونے سے پورٹس سے صنعتی خام مال کی ترسیل تقریباً معطل ہو چکی ہے، جس سے صنعتوں کا چلنا محال ہو رہا ہے۔ انہوں نے بتایا کہ ہڑتال کے باعث بندرگاہوں پر کھڑے کنٹینرز پر تاجروں کو بھاری ‘ڈیمرجز’ (Demurrage charges) ادا کرنے پڑ رہے ہیں، لہٰذا حکومت فوری طور پر یہ ڈیمرجز معاف کرے۔ ثاقب فیاض مگوں نے حکومت سے پٹرولیم مصنوعات کی قیمتوں میں یومیہ بنیادوں پر ردوبدل کے نظام پر نظرثانی کا مطالبہ کیا اور پیشکش کی کہ ایف پی سی سی آئی حکومت اور ٹرانسپورٹرز کے درمیان فوری مذاکرات کے ذریعے معاشی نقصان کو روکنے کے لیے ثالثی کا کردار ادا کرنے کو تیار ہے۔