قومی سطح پر یکساں ای فائلنگ نظام کے قیام کیلئے مشاورتی عمل شروع

چیف جسٹس آف پاکستان کی زیرِ صدارت قومی سطح پر یکساں اور مربوط ‘ای فائلنگ فریم ورک’ (Standardized National E-Filing Framework) کے قیام کے لیے اعلیٰ سطحی مشاورتی اجلاس منعقد ہوا۔ قومی عدالتی پالیسی ساز کمیٹی کے چیئرمین کی حیثیت سے چیف جسٹس نے اس اجلاس کی صدارت کی، جس میں پاکستان بار کونسل، سپریم کورٹ بار ایسوسی ایشن، صوبائی بار کونسلز کے نمائندگان اور لا اینڈ جسٹس کمیشن کے سینئر افسران نے شرکت کی۔ اس کا بنیادی مقصد سپریم کورٹ، ہائی کورٹس اور ضلعی عدالتوں میں الیکٹرانک کیس فائلنگ کے لیے یکساں معیارات اور عمل وضع کرنا ہے۔

چیف جسٹس آف پاکستان نے زور دیا کہ وکلاء اور بار کونسلز عدالتی نظام کے بنیادی صارف ہیں، اسی لیے ابتدائی مرحلے سے ہی ان کی عملی ضروریات اور تجاویز کو اس فریم ورک کا حصہ بنایا جا رہا ہے۔ اجلاس میں طے پایا کہ نیشنل ای فائلنگ ٹیمپلیٹس کو حتمی شکل دینے کے لیے ایک مشترکہ کمیٹی قائم کی جائے گی جس میں بار کونسلز، سپریم کورٹ بار، اور تمام عدالتوں کے رجسٹرارز شامل ہوں گے۔ بار نمائندگان نے اس ڈیجیٹل اصلاحاتی قدم کو سراہتے ہوئے کہا کہ اس سے مقدمات دائر کرنے اور ٹریکنگ کا عمل نہایت آسان اور مؤثر ہو جائے گا۔ فریم ورک کو حتمی شکل دینے کے لیے آئندہ مشاورتی اجلاس 20 اگست 2026ء کو منعقد ہو گا۔