پاکستان، بیلاروس کا اقتصادی و تجارتی تعاون نئی سطح پر لے جانے پر اتفاق

اسلام آباد میں پاکستان اور بیلاروس کے مشترکہ وزارتی کمیشن کے نویں اجلاس میں دونوں ممالک نے دوطرفہ اقتصادی و تجارتی تعاون کو مزید وسعت دینے اور تجارت و سرمایہ کاری کے نئے مواقع تلاش کرنے پر زور دیا ہے۔ وفاقی وزیر تجارت جام کمال خان نے اجلاس سے خطاب کرتے ہوئے کہا کہ دونوں ممالک کے تعلقات باہمی اعتماد اور مشترکہ مفادات پر مبنی ہیں اور اقتصادی روابط کو نئی بلندیوں تک لے جانے کے وسیع امکانات موجود ہیں۔

جام کمال خان نے بتایا کہ پاکستان اور بیلاروس نے زراعت، صنعت، توانائی، ٹیکنالوجی، دفاع، صحت، فارماسیوٹیکل، ہنرمند افرادی قوت اور ڈیجیٹل معیشت سمیت متعدد شعبوں میں تعاون بڑھانے پر مکمل اتفاق کیا ہے۔ انہوں نے کہا کہ مشترکہ ورکنگ گروپ اور ترجیحی تجارتی نظام (PTA) پر فزیبلٹی سٹڈی سے نئی تجارتی و سرمایہ کاری راہیں کھلیں گی، جبکہ دستخط شدہ پروٹوکول شعبہ وار تعاون کے لیے ایک جامع روڈ میپ فراہم کرتا ہے۔ انہوں نے اس عزم کا اعادہ کیا کہ یہ دوستی باہمی احترام اور خوشحالی کے ساتھ مزید مستحکم ہوگی اور پاکستان مشترکہ وزارتی کمیشن کے دسویں اجلاس کی میزبانی کا منتظر ہے۔