سندھ حکومت کا چترال کے سیلاب متاثرین کیلئے امدادی سامان پشاور پہنچ گیا

حکومتِ سندھ کی جانب سے چترال کے سیلاب متاثرین کے لیے بھیجا گیا امدادی سامان پشاور پہنچ گیا ہے، جہاں پی ڈی ایم اے (PDMA) سندھ کے حکام نے 10 ٹرکوں پر مشتمل ایمرجنسی ریلیف راشن گورنر خیبرپختونخوا فیصل کریم کنڈی کے حوالے کر دیا۔ خوراک، پینے کے پانی اور نان فوڈ آئٹمز پر مشتمل یہ سامان پاکستان ہلالِ احمر خیبرپختونخوا کے ذریعے چترال کے متاثرہ علاقوں میں تقسیم کیا جائے گا۔ اس موقع پر گفتگو کرتے ہوئے گورنر فیصل کریم کنڈی نے صدر آصف علی زرداری، چیئرمین بلاول بھٹو اور وزیراعلیٰ سندھ کا شکریہ ادا کرتے ہوئے کہا کہ سندھ حکومت نے ہر مشکل گھڑی میں خیبرپختونخوا کا ساتھ دیا ہے۔

گورنر خیبرپختونخوا نے این ڈی ایم اے (NDMA) اور نیشنل ہائی وے اتھارٹی (NHA) سے متاثرہ علاقوں میں سڑکوں کی بحالی اور امدادی سرگرمیاں تیز کرنے کی اپیل کی۔ انہوں نے تشویش کا اظہار کرتے ہوئے کہا کہ این ڈی ایم اے کے 11 میں سے صرف ایک ویئر ہاؤس نوشہرہ میں ہے، جبکہ سیلاب کے خطرات کے پیشِ نظر ملاکنڈ اور ڈی آئی خان میں بھی نئے ویئر ہاؤسز قائم کیے جانے چاہئیں۔ فیصل کریم کنڈی نے صوبائی حکومت کو تنقید کا نشانہ بناتے ہوئے کہا کہ سندھ حکومت کی امداد پہنچ گئی لیکن صوبائی حکومت کا سامان ابھی تک متاثرین تک نہیں پہنچا۔ انہوں نے وزیراعلیٰ سہیل آفریدی، صوبائی وزراء اور ڈپٹی اسپیکر سے درخواست کی کہ وہ سیاست سے بالاتر ہو کر چترال کا دورہ کریں اور ریلیف کی خود نگرانی کریں۔