پاکستان سٹاک مارکیٹ میں انڈیکس ایک لاکھ 80 ہزار پوائنٹس کی حد پر بحال

پاکستان سٹاک مارکیٹ میں مثبت رجحان کی واپسی کے ساتھ ہی ہنڈرڈ انڈیکس ایک بار پھر 1 لاکھ 80 ہزار پوائنٹس کی اہم حد پر بحال ہو گیا ہے۔ کاروباری ہفتے کے تیسرے روز ٹریڈنگ کے آغاز پر ہی بازارِ حصص میں شدید تیزی دیکھی گئی، جہاں 1000 سے زائد پوائنٹس کے زبردست اضافے کی بدولت KSE-100 انڈیکس ایک لاکھ 80 ہزار 863 پوائنٹس کی بلندی تک جا پہنچا۔

اگرچہ ٹریڈنگ کے درمیانی اور آخری گھنٹوں میں تیزی کے اس شدید رجحان میں کچھ کمی ریکارڈ کی گئی، لیکن مارکیٹ کا اختتام مثبت زون میں ہی ہوا۔ کاروباری روز کے اختتام پر ہنڈرڈ انڈیکس 464 پوائنٹس کے مجموعی اضافے کے ساتھ 1 لاکھ 80 ہزار 311 پوائنٹس کی سطح پر بند ہوا۔ واضح رہے کہ اس سے قبل گزشتہ کاروباری روز کے اختتام پر انڈیکس میں 1463 پوائنٹس کی بڑی کمی دیکھی گئی تھی اور مارکیٹ 1 لاکھ 79 ہزار 846 پوائنٹس پر بند ہوئی تھی۔