امریکی فوج ہماری توقع سے کہیں زیادہ کمزور نکلی: مشیر ایرانی کمانڈر کا بڑا دعویٰ

پاسدارانِ انقلاب کے کمانڈر کے مشیر محمد رضا نقدی نے دعویٰ کیا ہے کہ امریکہ کے ساتھ جاری تنازع کے دوران ایران نے انتہائی اہم فوجی تجربہ حاصل کیا ہے اور اس دوران امریکی فوج توقعات سے کہیں زیادہ کمزور ثابت ہوئی ہے۔ امریکی نشریاتی ادارے ‘پی بی ایس’ (PBS) کو دیے گئے ایک انٹرویو میں انہوں نے موقف اپنایا کہ ایران اب تک اس جنگ میں کامیاب رہا ہے اور مستقبل میں بھی اپنی یہ کامیابی برقرار رکھنے کے لیے مکمل طور پر پرعزم ہے۔

محمد رضا نقدی کا کہنا تھا کہ گزشتہ پانچ ماہ کے دوران ایرانی افواج نے میدانِ جنگ میں نہ صرف اپنی صلاحیتوں کو آزمایا بلکہ امریکی فوج کی جنگی حکمت عملی اور کمزوریوں کا بھی قریب سے مشاہدہ کیا۔ انہوں نے کہا کہ اس سے قبل ایران کو امریکہ کے ساتھ ایسی براہِ راست جنگ کا تجربہ حاصل نہیں تھا، تاہم اس طویل معرکے نے ایرانی فورسز کو مستقبل کے لیے جدید ترین جنگی حکمت عملی سیکھنے کا نایاب موقع فراہم کیا ہے۔ ان کا مزید کہنا تھا کہ ایران خود کو اس جنگ کا فاتح سمجھتا ہے اور حاصل ہونے والا یہ تجربہ ان کی آنے والی ملٹری سٹریٹجی کے لیے سنگِ میل ثابت ہوگا۔ واضح رہے کہ ان دعوؤں پر فی الحال امریکی حکام یا فوج کی جانب سے کوئی رسمی ردِعمل سامنے نہیں آیا ہے۔