مال روڈ واقعہ اس بات کا اشارہ ہے کہ 27 ستمبر کو بھی ایسا ہی ہوسکتا ہے، طلال چوہدری

وزیر مملکت برائے داخلہ طلال چوہدری نے اسلام آباد میں پریس کانفرنس کرتے ہوئے کہا ہے کہ راولپنڈی مال روڈ پر پیش آنے والا واقعہ اس بات کا اشارہ ہے کہ 27 ستمبر کو بھی ایسا ہی پیش آ سکتا ہے۔ انہوں نے واضح طور پر خبردار کیا کہ پاکستان کو کسی صورت سیاسی عدم استحکام کا شکار نہیں ہونے دیا جائے گا اور اگر اس نوعیت کا کوئی حملہ دوبارہ ہوا تو حملہ آوروں کے ہاتھ کاٹ دیے جائیں گے۔ طلال چوہدری کا کہنا تھا کہ نو مئی کا واقعہ ہو یا مال روڈ کا سانحہ، ان دونوں کی اصل وجہ بانی پی ٹی آئی کی تقاریر اور سوشل میڈیا پوسٹس کے ذریعے پھیلائی جانے والی نفرت اور انتشار کی سیاست ہے۔

وزیر مملکت نے پی ٹی آئی کی قیادت کو آڑے ہاتھوں لیتے ہوئے کہا کہ پارٹی یہ کہہ کر بری الذمہ نہیں ہو سکتی کہ ان کا اس کارکن سے کوئی تعلق نہیں، کیونکہ ایک طرف اس کا دفاع کیا جا رہا ہے اور دوسری طرف وہی کارکن خیبر پختونخوا ہاؤس میں مقیم رہا اور پارٹی قیادت سے ملاقاتیں کرتا رہا۔ انہوں نے کہا کہ پی ٹی آئی نوجوانوں کے ذہنوں میں نفرت بھر کر اور شہداء کی تضحیک کر کے خود اپنے آپ کو مائنس کر رہی ہے۔ انہوں نے بتایا کہ مال روڈ واقعے کی مکمل آزادانہ اور شفاف تحقیقات جاری ہیں جن کے تمام حقائق جلد قوم کے سامنے لائے جائیں گے۔