سوراب میں بم دھماکہ: سکیورٹی فورسز کے آپریشن میں 18 دہشتگرد ہلاک، 3 شہری شہید

بلوچستان کے ضلع سوراب میں ‘فتنہ الہندوستان’ سے وابستہ دہشت گردوں کی جانب سے تیار کیا جانے والا گاڑی میں نصب دیسی ساختہ بم (VBIED) تیاری کے مرحلے کے دوران اچانک پھٹ گیا۔ پاک فوج کے شعبہ تعلقاتِ عامہ (آئی ایس پی آر) کے مطابق قبل از وقت ہونے والے اس شدید دھماکے اور بارودی مواد کے ثانوی دھماکوں کی زد میں آ کر 18 دہشت گرد موقع پر ہی ہلاک اور متعدد زخمی ہو گئے، جبکہ قریب موجود 3 شہری بھی جان کی بازی ہار گئے۔

ترجمان پاک فوج نے بتایا کہ واقعے کے بعد سکیورٹی فورسز اور بلوچستان پولیس نے فوری طور پر مشترکہ کلیئرنس آپریشن کا آغاز کیا۔ فرار ہونے والے دہشت گردوں کی نقل و حرکت کا سراغ لگا کر کی گئی مؤثر کارروائی میں مزید 10 دہشت گردوں کو جہنم واصل کیا گیا، جس کے بعد اب تک مارے جانے والے دہشت گردوں کی مجموعی تعداد 18 ہو گئی ہے۔ فائرنگ کے شدید تبادلے میں 2 جوان زخمی ہوئے جبکہ علاقے کو پاک کرنے کے لیے سینیٹائزیشن آپریشن جاری ہے۔ آئی ایس پی آر کے مطابق قومی ایکشن پلان اور ‘عزمِ استحکام’ کے تحت غیر ملکی سرپرستی میں چلنے والی دہشت گردی کے مکمل خاتمے تک کارروائیاں جاری رہیں گی۔