عثمان خواجہ کے انکشافات نے بال ٹیمپرنگ سکینڈل کو پھر زندہ کر دیا

آسٹریلیا کے سابق ٹیسٹ کرکٹر عثمان خواجہ کے حالیہ انکشافات نے سال 2018 کے ہنگامہ خیز بال ٹیمپرنگ اسکینڈل ‘سینڈ پیپر گیٹ’ کو ایک بار پھر زندہ کر دیا ہے، جس میں دعویٰ کیا گیا ہے کہ اس اسکینڈل کے بارے میں تمام آسٹریلوی کھلاڑیوں کو مکمل علم تھا۔

عثمان خواجہ نے اپنے انکشافات اپنی نئی سوانح عمری (آٹو بائیو گرافی) بعنوان ‘صبر’ میں کیے ہیں۔ ان کا کہنا ہے کہ وہ نہیں چاہتے تھے کہ یہ معاملہ ہمیشہ کے لیے دب جائے، اور اب آٹھ برس بعد سچائی کا سامنے آنا ضروری تھا۔ عثمان خواجہ کے مطابق، پورٹ الزبتھ ٹیسٹ اور کیپ ٹاؤن ٹیسٹ سے قبل بھی بال ٹیمپرنگ کی کارروائیاں ہوتی رہی ہیں، اور جنوبی افریقہ کے خلاف سیریز کے دوران اس حوالے سے ٹیم میں باقاعدہ گفتگو بھی ہوئی تھی۔ انہوں نے مؤقف اپنایا کہ پوری ٹیم کو اس معاملے کی ذمہ داری لینی چاہیے تھی، کیونکہ صرف تین کھلاڑیوں کو سزا ملنا انصاف کا پورا تقاضا نہیں تھا۔

کتاب میں دعویٰ کیا گیا ہے کہ اس دوران اسٹیو اسمتھ نے معاملے سے لاعلم رہنے کا فیصلہ کیا تھا۔ یاد رہے کہ 24 مارچ 2018 کو کیپ ٹاؤن ٹیسٹ کے دوران پیش آنے والے اس واقعے پر ڈیوڈ وارنر، اسٹیو اسمتھ اور کیمرون بینکرافٹ کو سخت سزاؤں کا سامنا کرنا پڑا تھا، جبکہ اس وقت پیٹ کمنز سمیت چار بولرز نے بال ٹیمپرنگ سے لاعلمی ظاہر کی تھی۔ دوسری جانب، کرکٹ آسٹریلیا نے عثمان خواجہ کے انکشافات پر ردعمل دیتے ہوئے کہا ہے کہ گزشتہ 8 برسوں میں بہت سی افواہیں سامنے آئیں، تاہم بورڈ اپنی اصل انٹیگریٹی (دیانت داری) تحقیقات کے نتائج سے مکمل طور پر مطمئن ہے۔