پاکستان بیڈمنٹن فیڈریشن کے انتخابات غیر قانونی قرار

اسلام آباد ہائی کورٹ نے پاکستان بیڈمنٹن فیڈریشن (PBF) کے 24 اکتوبر 2025 کو منعقد ہونے والے تمام انتخابی نتائج اور کارروائی کو غیر قانونی قرار دیتے ہوئے باطل کر دیا ہے اور 90 روز کے اندر نئے انتخابات کرانے کا حکم جاری کیا ہے۔

جسٹس اعظم خان نے امتیاز گل اور دیگر درخواست گزاروں کی جانب سے دائر کردہ آئینی درخواست پر تحفظات کا جائزہ لینے کے بعد یہ اہم فیصلہ سنایا۔ عدالت عالیہ نے پاکستان اسپورٹس بورڈ (PSB) کو فوری طور پر نیا الیکشن کمیشن نوٹیفائی کرنے اور اپنے آئین کے رول 17 کے عین مطابق تمام انتخابی عمل 90 دنوں کے اندر مکمل کرنے کی ہدایت کی ہے۔

عدالتی فیصلے کے تحت نئے انتخابی عمل کی شفافیت اور روزمرہ امور کو چلانے کے لیے وزارتِ بین الصوبائی رابطہ (IPC) کے ایڈیشنل سیکرٹری کی سربراہی میں ایک عبوری ایڈہاک کمیٹی قائم کر دی گئی ہے۔ اس کمیٹی میں ڈائریکٹر نیشنل اسپورٹس فیڈریشنز پاکستان اسپورٹس بورڈ کے علاوہ پنجاب، خیبر پختونخوا، سندھ اور بلوچستان سے ایک ایک سابق بیڈمنٹن چیمپئن کو شامل کرنے کی ہدایت دی گئی ہے۔ یہ ایڈہاک کمیٹی منتخب باڈی کے چارج سنبھالنے تک فیڈریشن کے تمام انتظامی امور کی دیکھ بھال کرے گی۔