ٹیسٹ میچز میں پرفارمنس سینئرز کی بھی ذمے داری ہے: سعود شکیل

پاکستان ٹیسٹ ٹیم کے نائب کپتان سعود شکیل نے کہا ہے کہ ٹیسٹ کرکٹ میں قومی ٹیم کی پرفارمنس میں تسلسل کا نہ ہونا صرف جونیئرز ہی نہیں بلکہ سینئر کھلاڑیوں کی بھی برابر کی ذمہ داری ہے۔

اسلام آباد میں میڈیا سے گفتگو کرتے ہوئے سعود شکیل نے کہا کہ پاکستان اور سری لنکا کے درمیان آئندہ ٹیسٹ سیریز انتہائی اہم ہے، اور اس وقت ہماری ٹیسٹ ٹیم میں زیادہ تر نئے اور نوجوان کھلاڑی شامل ہیں۔ انہوں نے کہا کہ ہوم سیریز نوجوانوں کے لیے اپنی صلاحیتیں منوانے کا بہترین موقع فراہم کرتی ہے، جبکہ راولپنڈی میں نومبر کا موسم ٹیسٹ کرکٹ کے لیے نہایت سازگار ہے۔ نائب کپتان نے اپنی بیٹنگ کا ذکر کرتے ہوئے بتایا کہ دورہ انگلینڈ کے دوران ان کا بیٹنگ ردھم واپس آیا تھا اور وہ اپنی حالیہ کارکردگی اور قائد اعظم ٹرافی کی پرفارمنس سے مکمل مطمئن ہیں۔

سعود شکیل کا کہنا تھا کہ راولپنڈی کرکٹ اسٹیڈیم میں وہ پہلے بھی سنچری اسکور کر چکے ہیں اور اس میدان سے ان کی اچھی یادیں وابستہ ہیں۔ پنڈی کی پچ کبھی کبھار فاسٹ بولرز کے لیے مددگار ثابت ہوتی ہے، تاہم وکٹ پر سیٹ ہونے کے بعد بیٹرز کے لیے شاٹس کھیلنا آسان ہو جاتا ہے۔ واضح رہے کہ پاکستان اور سری لنکا کے درمیان دو ٹیسٹ میچز کی سیریز کا پہلا ٹیسٹ 9 نومبر سے پنڈی کرکٹ اسٹیڈیم میں شروع ہو رہا ہے، جبکہ دوسرا اور آخری ٹیسٹ میچ 17 نومبر سے قذافی اسٹیڈیم لاہور میں کھیلا جائے گا۔