امریکی سپریم کورٹ کا ٹیرف فیصلہ:  نفاذ کیلئے دیگر قوانین کا سہارا لیا جائے گا، امریکی وزیر خزانہ

واشنگٹن: امریکی وزیر خزانہ اسکاٹ بیسنٹ نے کہا ہے کہ اب ٹیرف کے لیے دیگر قوانین کا سہارا لیا جائے گا تاکہ عالمی تجارت میں استحکام قائم رکھا جا سکے۔ انہوں نے بتایا کہ رواں سال کے دوران ٹیرف اسی سطح پر رہیں گے جو موجودہ ہیں۔

امریکی وزیر خزانہ نے کہا کہ اب ٹیرف کے لیے سیکشن 232 اور سیکشن 301 استعمال کیے جائیں گے، جنہیں عدالتوں میں کئی مرتبہ چیلنج کیا گیا مگر عدالتوں نے انہیں درست قرار دیا۔

بیسنٹ نے کہا کہ امریکی سپریم کورٹ نے صدر ٹرمپ کے اختیارات محدود کر دیے ہیں، تاہم ممالک کے لیے ٹیرف کی سطح ایک جیسی رہے گی، صرف نفاذ کا طریقہ بدل جائے گا۔

یاد رہے کہ امریکی سپریم کورٹ نے صدر ڈونلڈ ٹرمپ کے ٹیرف اقدامات کو کالعدم قرار دیا تھا۔ عدالت نے کہا کہ ٹرمپ نے ٹیرف عائد کرتے وقت اپنے اختیارات سے تجاوز کیا، جس سے عالمی تجارت متاثر ہوئی۔ عدالت کے مطابق قومی ایمرجنسی کے لیے بنایا گیا قانون اضافی ٹیرف لگانے کی اجازت نہیں دیتا۔

صدر ڈونلڈ ٹرمپ نے اس فیصلے پر ردعمل دیتے ہوئے کہا کہ وہ جو چاہیں کرسکتے ہیں، اور ممالک کی خوشی زیادہ دیر قائم نہیں رہے گی۔